آبنائے ہرمز کو کھولنے یا بند کرنے کا اختیار صرف ایران کے پاس ہوگا: ایرانی نائب وزیرخارجہ

ایرانی نائب وزیر خارجہ کاظم غریب آبادی نے امریکی صدر ڈونلڈ ٹرمپ کے آبنائے ہرمز کو امریکی علاقہ قرار دینے کے بیان کو شدید تنقید کا نشانہ بناتے ہوئے واضح کیا ہے کہ اس اہم بحری گزرگاہ کو کھولنے یا بند کرنے کا اختیار صرف ایران کے پاس ہوگا۔ انہوں نے زور دے کر کہا کہ آبنائے ہرمز ایران کی تھی، ہے اور رہے گی، اور اسے کسی ٹوئٹ، طیارہ بردار بحری جہاز یا حکم کے ذریعے قبضے میں نہیں لیا جا سکتا۔ کاظم غریب آبادی کا مزید کہنا تھا کہ ایران امریکہ کی دھمکیوں سے خوفزدہ نہیں ہوگا اور جب تک امریکہ اپنی شکست تسلیم نہیں کرتا، ایران اپنی ناکہ بندی جاری رکھے گا۔ یاد رہے کہ صدر ٹرمپ نے فاکس نیوز کو دیے گئے بیان میں آبنائے ہرمز کو امریکی علاقہ قرار دینے اور ایران پر سخت معاشی دباؤ ڈالنے کا اعلان کیا تھا۔