ایران کے جوابی حملے، شام، اردن، بحرین اور کویت کو نشانے پر لے لیا

امریکا کی جانب سے مسلسل 9ویں رات کی جانے والی بمباری کے جواب میں ایران کے پاسدارانِ انقلاب (IRGC) نے شام، اردن، بحرین اور کویت میں موجود امریکی اہداف پر جوابی حملے کر دیے ہیں۔ پاسدارانِ انقلاب کے مطابق، اردن کے علاقے الازرق میں امریکی فوجی تنصیبات پر بیلسٹک میزائلوں سے حملہ کر کے 20 گوداموں سمیت امریکی فوج کے C-17 ٹرانسپورٹ اور P-8 کمانڈ اینڈ کنٹرول طیاروں کو تباہ کر دیا گیا ہے، جس میں متعدد امریکی فوجی ہلاک ہوئے ہیں۔ اس کے علاوہ شام کے علاقے التنف میں امریکی کمانڈ سینٹر اور آبنائے ہرمز کے جنوبی راستے سے گزرنے والے 2 آئل ٹینکرز کو بھی دھماکے سے تباہ کرنے کا دعویٰ کیا گیا ہے۔ دوسری جانب بحرین اور کویت میں خطرے کے سائرن گونجتے رہے، جہاں امریکی سفارت خانے اور مقامی حکام نے شہریوں کو محفوظ مقامات پر رہنے کی ہدایت کی ہے۔ واضح رہے کہ واشنگٹن اور تہران کے درمیان امن مذاکرات میں تعطل کے بعد مشرقِ وسطیٰ میں جنگ شدید تر ہو چکی ہے اور دونوں ممالک کی جانب سے آبنائے ہرمز اور بندرگاہوں کی ناکہ بندی جاری ہے۔