ایران کا خلیجی ممالک کو امریکا اور اسرائیل کی سہولت کاری پر سخت انتباہ

ایران کی وزارتِ خارجہ نے خلیجی خطے کے ممالک کو سخت خبردار کیا ہے کہ وہ امریکا اور اسرائیل کو ایران پر ممکنہ حملوں کے لیے اپنی سرزمین، حدود یا عسکری سہولیات استعمال کرنے کی اجازت نہ دیں۔

ایرانی خبر رساں ادارے کے مطابق وزارتِ خارجہ نے ہفتے کے روز جاری کردہ ایک اہم بیان میں واضح کیا کہ خطے کی تمام حکومتوں کی یہ قانونی، مذہبی اور اخلاقی ذمہ داری بنتی ہے کہ وہ امریکا اور صیہونی حکومت کو ایران کے خلاف کسی بھی قسم کے حملوں کے لیے اپنی سرزمین اور سہولیات کے استعمال سے ہر صورت روکیں۔

ایرانی وزارتِ خارجہ نے اپنے بیان میں مزید کہا کہ ایران کی بحری ناکہ بندی کا سلسلہ جاری رہنا اور ایرانی فوجی اہداف، شہری آبادیوں اور بنیادی ڈھانچے کو نشانہ بنانا کھلی جارحیت کے زمرے میں آتا ہے جو کہ اقوامِ متحدہ کے چارٹر کی سنگین خلاف ورزی ہے۔ بیان میں عزم کا اعادہ کیا گیا کہ ایران اپنی قومی سلامتی اور خود مختاری کے تحفظ اور دفاع کے لیے اپنا قانونی حق لازمی اور مکمل طور پر استعمال کرے گا۔