عالمی معائنہ کاروں کو جوہری مقامات کا دورہ کرانے کا ارادہ نہیں: اسماعیل بقائی

ایران کی وزارتِ خارجہ کے ترجمان اسماعیل بقائی نے ایک اہم پریس کانفرنس کے دوران امریکہ اور اسرائیل کی ایران مخالف پالیسیوں پر سخت ردِعمل دیتے ہوئے واضح کیا ہے کہ بیرونی جارحیت اور جنگی کوششوں کے خلاف ایران کا جواب ہمیشہ استقامت، دفاع، وقار اور قومی فخر کی ایک بے مثال داستان رہا ہے۔ انہوں نے عالمی برادری پر واضح کیا کہ تہران کسی بھی دباؤ میں آئے بغیر اپنی قومی خودمختاری کا تحفظ کرنا خوب جانتا ہے۔

 اسماعیل بقائی نے دوٹوک انداز میں عالمی طاقتوں کو پیغام دیا ہے کہ ایران بین الاقوامی جوہری توانائی ایجنسی (IAEA) کے معائنہ کاروں کو اپنے حساس جوہری مقامات کا دورہ کروانے کا کوئی ارادہ نہیں رکھتا اور نہ ہی اس سلسلے میں کسی قسم کا بیرونی دباؤ قبول کیا جائے گا۔ سوئٹزرلینڈ مذاکرات کے بعد بحال ہونے والے فنڈز کے حوالے سے انہوں نے کہا کہ ایران کے منجمد اثاثوں کے استعمال پر اب کوئی پابندی نہیں ہے اور تہران ان فنڈز کو مکمل آزادی کے ساتھ استعمال کرے گا۔ انہوں نے واضح کیا کہ ان اربوں ڈالرز کے استعمال کے طریقہ کار پر کسی بھی بیرونی یا امریکی شرط کو ہرگز تسلیم نہیں کیا جائے گا۔ترجمان نے خطے کی صورتحال پر بات کرتے ہوئے کہا کہ حالیہ تنازع دراصل ایران کی قدیم اور عظیم تہذیب کو ختم کرنے کی گہری سازشوں سے جڑا ہوا ہے۔ لہٰذا، منجمد رقوم کا استعمال ایران کسی بیرونی ڈکٹیشن کے بجائے خالصتاً اپنی قومی پالیسی اور ملکی مفادات کے مطابق کرے گا۔

اسماعیل بقائی کا کہنا تھا کہ ایران نے تاریخ کے ہر مرحلے پر اپنی ملکی خودمختاری اور قومی عزتِ نفس کے دفاع کو اولین ترجیح دی ہے اور مستقبل میں بھی ملکی دفاع پر کوئی سمجھوتہ نہیں کیا جائے گا۔