امریکی پابندیاں دنیا کو دوبارہ نوآبادیاتی دور میں دھکیل سکتی ہیں: اسماعیل بقائی

ایران کے ترجمان وزارتِ خارجہ اسماعیل بقائی نے واشنگٹن کی طرف سے عائد کردہ نئی پابندیوں کو شدید تنقید کا نشانہ بناتے ہوئے انہیں ملکی حدود سے تجاوز، بین الاقوامی تجارت میں کھلی مداخلت اور عالمی قوانین کی سنگین خلاف ورزی قرار دیا ہے۔ ترجمان نے کہا کہ امریکا اپنی مرضی دیگر ممالک اور کمپنیوں پر مسلط کرنے کی کوشش کر رہا ہے، جبکہ کسی بھی ریاست کو یہ حق حاصل نہیں کہ وہ بینکوں یا تجارتی اداروں پر دباؤ ڈال کر انہیں آزادانہ اور جائز معاشی سرگرمیوں سے روکے۔

ترجمان بقائی کا مزید کہنا تھا کہ یہ اقدامات صرف اقتصادی جنگ کا تسلسل نہیں بلکہ اقوام متحدہ کے چارٹر کی خلاف ورزی اور آزاد ریاستوں کی خودمختاری پر حملہ ہیں۔ دوسری جانب ایرانی وزیرِ خارجہ عباس عراقچی نے امریکی صدر ڈونلڈ ٹرمپ کی جانب سے سخت ترین پابندیوں کی دھمکی کو مسترد کرتے ہوئے کہا کہ امریکی دباؤ اور غیر مشروط سرنڈر کرانے کی پالیسیاں ماضی میں بھی ناکام رہی ہیں اور موجودہ معاشی کارروائی کا انجام بھی ناکامی کے سوا کچھ نہیں ہوگا۔