تجارتی آزادی کے احترام تک سمندری راستوں پر آزادانہ آمدورفت ممکن نہیں، عباس عراقچی

تہران: ایرانی وزیر خارجہ عباس عراقچی نے سمندری راستوں پر آزادانہ آمد و رفت کو تجارت کی آزادی کے احترام سے مشروط کرتے ہوئے واضح کیا ہے کہ ایران نے امریکہ کے ساتھ مذاکرات کے تمام دروازے بند کر دیے ہیں۔ سماجی رابطے کی ویب سائٹ ‘ایکس’ (سابقہ ٹویٹر) پر اپنے ایک بیان میں انہوں نے کہا کہ آبنائے ہرمز بند نہیں ہے، تاہم بحری جہازوں کی نقل و حرکت میں ہچکچاہٹ کی اصل وجہ انشورنس کمپنیوں کا وہ خوف ہے جو امریکہ اور اسرائیل کی جانب سے چھیڑی گئی جنگ کے باعث پیدا ہوا ہے۔

عباس عراقچی نے دو ٹوک الفاظ میں کہا کہ نہ تو کوئی انشورنس کمپنی اور نہ ہی ایران مزید کسی دھمکی سے مرعوب ہوگا۔ انہوں نے متنبہ کیا کہ اگر عالمی سطح پر تجارتی اصولوں کا احترام نہ کیا گیا تو اس کے نتائج بھی اسی نوعیت کے ہوں گے۔ ایرانی وزیر خارجہ نے امریکہ پر کڑی تنقید کرتے ہوئے کہا کہ واشنگٹن نے ماضی میں مذاکرات کے نام پر ایران کو بدترین دھوکا دیا ہے، اس لیے اب امریکہ پر اعتماد کی کوئی گنجائش باقی نہیں بچی۔

ایک اور بیان میں انہوں نے انکشاف کیا کہ حملہ نہ کرنے کے امریکی وعدے محض ایک بدترین تجربہ ثابت ہوئے ہیں۔ عباس عراقچی کے مطابق علاقائی جنگ نے سفارت کاری کے تمام امکانات کو مکمل طور پر ختم کر دیا ہے اور اب ایران کسی بھی امریکی وعدے کو سنجیدہ لینے کے بجائے اپنے دفاعی و تجارتی مفادات کے تحفظ کو ترجیح دے رہا ہے۔