ایران کا امریکی و اسرائیلی انٹیلی جنس سے وابستہ 2 افراد ہلاک کرنے کا دعویٰ

ایران کی وزارتِ انٹیلی جنس اور سیکیورٹی فورسز نے سیستان و بلوچستان میں سرچ آپریشن کے دوران امریکی اور اسرائیلی انٹیلی جنس سے وابستہ 2 افراد کو ہلاک جبکہ 4 کو گرفتار کر لیا ہے۔ ایرانی سرکاری نشریاتی ادارے کے مطابق اس کارروائی میں 2 مختلف آپریشنل سیلز کو نشانہ بنایا گیا جو ملک میں حساس تنصیبات، بنیادی ڈھانچے کو نقصان پہنچانے اور عدم استحکام پھیلانے کی منصوبہ بندی کر رہے تھے۔ رپورٹ کے مطابق 4 ملزمان کو سرحد کے ذریعے ملک میں داخل ہونے کی کوشش کے دوران گرفتار کیا گیا۔ اگرچہ ایرانی حکام نے ہلاک و گرفتار افراد کی شناخت یا قومیت کی تفصیلات فوری طور پر عام نہیں کیں، تاہم ان کا کہنا ہے کہ یہ کارروائی تخریبی سرگرمیوں کی روک تھام اور قومی سلامتی کو یقینی بنانے کے لیے کی گئی ہے۔