ایران میں اسرائیل کیلئے جاسوسی کے الزام میں 2 افراد کو پھانسی دے دی گئی

ایرانی عدالتی خبر رساں ادارے ‘میزان’ کے مطابق ایران نے اسرائیل کے لیے جاسوسی اور حساس فوجی و سیکیورٹی مراکز کی معلومات فراہم کرنے کے جرم میں دو افراد، امید بہزاد اور پوریا صفوت، کو پھانسی دے دی ہے۔ دونوں ملزمان پر الزام تھا کہ انہوں نے اہم ایرانی عسکری مقامات کی تصاویر اور سیکیورٹی ڈیٹا اسرائیل کو منتقل کیا۔ رپورٹ میں دعویٰ کیا گیا ہے کہ ان افراد کی فراہم کردہ معلومات کی بنیاد پر ماضی کی عسکری کشیدگی کے دوران ایرانی پاسدارانِ انقلاب کی چوکیوں اور حساس عسکری مراکز کو نشانہ بنایا گیا۔ اگرچہ ایرانی حکام نے عدالتی کارروائی کی مزید تفصیلات شائع نہیں کیں اور اسرائیل کی جانب سے بھی فی الحال کوئی باضابطہ ردعمل سامنے نہیں آیا ہے، تاہم رائٹرز کی ایک رپورٹ کے مطابق مغربی ذرائع نے تسلیم کیا تھا کہ حساس چوکیوں پر حملوں کے لیے زمینی سطح سے حاصل کردہ انٹیلی جنس کا سہارا لیا گیا تھا۔