امریکا سفارت کاری میں ناکامی کے بعد پابندیوں کا سہارا لیتا ہے: اسماعیل بقائی

ایرانی وزارتِ خارجہ کے ترجمان اسماعیل بقائی نے کہا ہے کہ امریکہ سفارت کاری اور سیاسی محاذ پر ناکامی کا سامنا کرنے کے بعد ہمیشہ غیر قانونی پابندیوں کا سہارا لیتا ہے۔

سماجی رابطے کی سائٹ ایکس (سابقہ ٹوئٹر) پر جاری اپنے ایک بیان میں اسماعیل بقائی نے کہا کہ جب امریکی پابندیاں ناکام ہو جاتی ہیں تو واشنگٹن ان کی شدت میں مزید اضافہ کر دیتا ہے۔ ان کا کہنا تھا کہ امریکہ کی جانب سے عائد کی جانے والی پابندیاں اب کسی حکمتِ عملی یا پالیسی کا حصہ نہیں رہیں بلکہ یہ واشنگٹن کے لیے ایک غیر منطقی عادت بن چکی ہیں۔

ترجمان ایرانی وزارتِ خارجہ نے واضح کیا کہ ایران گزشتہ کئی دہائیوں سے امریکی اقتصادی و سیاسی پابندیوں کا ڈٹ کر مقابلہ کرتا آیا ہے اور آئندہ بھی ان کے ذریعے تہران کو ہرگز دباؤ میں نہیں لایا جا سکتا۔ انہوں نے کہا کہ امریکہ اپنے پیدا کردہ علاقائی و عالمی بحرانوں سے محض پابندیوں کے ذریعے نہیں نکل سکتا، اور ایران پر نئ اور پرانی پابندیوں کا مسلسل نفاذ درحقیقت امریکی سفارت کاری کی مسلسل ناکامی کا کھلا اعتراف ہے۔

اسماعیل بقائی نے اپنے بیان کے اختتام پر زور دے کر کہا کہ دہائیوں کی کوششوں کے باوجود امریکی پابندیاں ایرانی قوم اور حکومت کو اپنے حقوق سے دستبردار کرنے یا جھکانے میں مکمل طور پر ناکام رہی ہیں۔