ایرانی حملوں میں 500 سے زائد امریکی فوجی مارے گئے، علی لاریجانی کا دعویٰ

ایرانی قومی سلامتی کونسل کے سربراہ علی لاریجانی نے دعویٰ کیا ہے کہ ایران کے حالیہ حملوں میں پانچ سو سے زائد امریکی فوجی ہلاک ہوچکے ہیں۔

سماجی رابطے کی ویب سائٹ ایکس پر جاری بیان میں ان کا کہنا تھا کہ سابق امریکی صدر ڈونلڈ ٹرمپ نے اسرائیلی وزیر اعظم بنیامین نیتن یاہو کی مبینہ غیر ذمہ دارانہ پالیسیوں کے نتیجے میں امریکی عوام کو ایران کے خلاف ناجائز جنگ میں دھکیل دیا۔

علی لاریجانی نے کہا کہ حالیہ دنوں میں پانچ سو سے زائد امریکی فوجی مارے جاچکے ہیں، اب خود فیصلہ کریں کہ کیا اب بھی امریکا پہلے ہے یا اسرائیل۔ انہوں نے مزید کہا کہ سپریم لیڈر آیت اللہ علی خامنہ ای کی شہادت کی صورت میں بھاری قیمت چکانا پڑے گی۔

دوسری جانب امریکی حکام نے کانگریس کو بند کمرہ بریفنگ میں بتایا ہے کہ ایران کے شاہد ڈرونز امریکی فضائی دفاعی نظام کے لیے بڑا چیلنج بن چکے ہیں اور ممکن ہے کہ تمام ڈرونز کو روکنا ممکن نہ ہو۔

امریکی میڈیا کے مطابق بریفنگ میں موجود دو ذرائع نے بتایا کہ وزیر دفاع پیٹ ہیگستھ اور چیئرمین جوائنٹ چیفس آف اسٹاف جنرل ڈین کین نے تسلیم کیا کہ یہ ڈرون توقع سے زیادہ مسئلہ پیدا کر رہے ہیں کیونکہ یہ کم بلندی اور کم رفتار سے پرواز کرتے ہیں، جس کے باعث انہیں بیلسٹک میزائلوں کے مقابلے میں روکنا زیادہ مشکل ہے۔

تاہم بعض حکام نے خدشات کو کم ظاہر کرتے ہوئے کہا کہ خلیجی اتحادی ممالک بڑی تعداد میں دفاعی میزائل ذخیرہ کر رہے ہیں۔