ایران کا امریکا پر فیفا ورلڈ کپ کی میزبانی کے اصولوں کی خلاف ورزی کا الزام

ایران نے امریکہ پر فیفا ورلڈ کپ 2026ء کی میزبانی کے عالمی اصولوں اور ضوابط کی کھلی خلاف ورزی کا سنگین الزام عائد کر دیا ہے۔

ایرانی دفترِ خارجہ کے ترجمان اسماعیل بقائی نے امریکی رویے پر شدید تنقید کرتے ہوئے اسے یکسر سیاسی قرار دے دیا ہے۔ اپنے ایک باضابطہ بیان میں اسماعیل بقائی کا کہنا تھا کہ ورلڈ کپ کے دوران ایرانی قومی ٹیم کے ساتھ انتہائی نامناسب اور غیر پیشہ ورانہ سلوک کیا گیا۔ انہوں نے انکشاف کیا کہ ٹورنامنٹ کی تیاریوں اور میچز کے لیے ایرانی ٹیم کے کئی اہم کوچز اور فٹبال فیڈریشن کے اعلیٰ حکام کو امریکی ویزے ہی جاری نہیں کیے گئے۔

ترجمان نے مزید کہا کہ ویزوں کے اجرا میں دانستہ طور پر پیدا کی جانے والی رکاوٹیں ابتدا ہی سے ایک بڑا مسئلہ رہیں، جبکہ ایرانی قومی ٹیم کو میچ وینیو (کھیل کے میدان) سے دور ایک الگ تھلگ مقام پر ٹھہرانا بھی انتظامیہ کی بدنیتی کو ظاہر کرتا ہے۔ ان کا کہنا تھا کہ ایرانی ٹیم کے ساتھ بین الاقوامی میزبانی کے مسلمہ تقاضوں کے بالکل برعکس سلوک کیا گیا ہے۔

اسماعیل بقائی نے امریکی وزیرِ ہوم لینڈ سکیورٹی کی جانب سے ورلڈ کپ میں ایران کی شکست اور ٹورنامنٹ سے اخراج پر دیے گئے متعصبانہ بیان کی بھی سخت الفاظ میں مذمت کی۔ انہوں نے کہا کہ ایک ذمہ دار امریکی عہدیدار کی طرف سے ایران کے باہر ہونے پر خوشی منانے اور تمسخر اڑانے کا بیان انتہائی نامناسب اور کھیل کے اسپرٹ کے منافی ہے۔