وزیر داخلہ محسن نقوی کا ڈائریکٹوریٹ جنرل امیگریشن اینڈ پاسپورٹس کا دورہ، جدید مانیٹرنگ نظام ”شکرا” کا افتتاح

وفاقی وزیر داخلہ محسن نقوی نے ڈائریکٹوریٹ جنرل آف امیگریشن اینڈ پاسپورٹس کا دورہ کیا اور پاسپورٹس کی درخواستوں، پرنٹنگ اور کارکردگی کے جدید ترین مانیٹرنگ سسٹم ”شکرا” کا باقاعدہ افتتاح کیا۔
اس موقع پر 24/7 مانیٹرنگ روم، کال سنٹر اور ایمرجنسی ٹریول ڈاکومنٹ کے ڈیجیٹل نظام کا بھی جائزہ لیا گیا۔ وزیر داخلہ کو سیکوئر ہائبریڈ انٹیلیجنس فار نالج بینڈ ریسپانس انالیٹکس (شکرا) سسٹم کے بارے میں تفصیلی بریفنگ دی گئی۔
محسن نقوی نے کہا کہ پاکستان پاسپورٹ سسٹم اب دنیا کے بہترین ممالک کے نظام کے مطابق ڈھالا گیا ہے اور نئے نظام سے پاسپورٹ درخواستوں اور ڈیلیوری کی رئیل ٹائم مانیٹرنگ ممکن ہوگی۔
انہوں نے بتایا کہ ہر مرحلے پر نگرانی کی جائے گی، شہریوں کو تیز رفتار اور محفوظ خدمات فراہم کرنا ہمارا مقصد ہے، اور جدید آٹومیٹک جرمن مشینوں سے انسانی مداخلت کو ختم کر کے پروڈکشن کی استعداد میں اضافہ کیا گیا ہے۔
وزیر داخلہ نے ای مانیٹرنگ روم، کال سنٹر، فرانزک لیب اور جدید پروڈکشن یونٹ کا دورہ بھی کیا۔ اس موقع پر ڈی جی ایف آئی اے، ڈی جی امیگریشن اینڈ پاسپورٹس، چیف کمشنر اسلام آباد، آئی جی اسلام آباد پولیس اور دیگر اعلیٰ حکام موجود تھے۔