پاکستان ہمیشہ زندہ باد، قوم کو آزادی کی خوشیاں مبارک ہوں، محسن نقوی

وفاقی وزیرِ داخلہ محسن نقوی نے یومِ آزادی کے پرمسرت موقع پر تمام اہلِ وطن کو دلی مبارکباد پیش کرتے ہوئے کہا ہے کہ 14 اگست ہماری درخشاں قومی تاریخ کا ایک عظیم، یادگار اور ناقابلِ فراموش دن ہے۔ اپنے خصوصی پیغام میں انہوں نے کہا کہ آزادی ہمارے بزرگوں کی عظیم جدوجہد اور بے مثال قربانیوں کا ثمر ہے۔ انہوں نے قائد اعظم محمد علی جناحؒ اور تحریکِ پاکستان کے تمام رہنماؤں کو خراجِ عقیدت پیش کرتے ہوئے کہا کہ قوم ان اکابرین کے احسانات کبھی نہیں اتار سکتی۔ وزیرِ داخلہ نے قیامِ پاکستان کے لیے دی جانے والی قربانیوں کے ساتھ ساتھ دفاعِ وطن، قیامِ امن اور دہشت گردی کے خلاف جنگ میں اپنی جانوں کا نذرانہ پیش کرنے والے تمام شہداء اور غازیوں کو زبردست سلام پیش کیا۔

محسن نقوی نے زور دیا کہ ایمان، اتحاد اور تنظیم کے سنہری اصول ہی پاکستان کی طاقت، پہچان اور بقا کی سب سے بڑی ضمانت ہیں۔ انہوں نے کہا کہ آج وطنِ عزیز کو اندرونی و بیرونی چیلنجز کا سامنا ہے جن سے نمٹنے کے لیے پوری قوم کا ایک پیج پر متحد ہونا ناگزیر ہے۔ ان کا کہنا تھا کہ پاکستان جیسا خوبصورت اور وسائل سے مالا مال ملک دنیا میں نہیں ہے، لیکن بدقسمتی سے ماضی میں ملکی مفاد پر باہمی اختلافات کو ترجیح دی گئی۔ محسن نقوی نے کہا کہ اب وقت آ گیا ہے کہ زبانی جمع خرچ کے بجائے ماضی کی غلطیوں سے سبق سیکھا جائے، ذاتی مفادات کو ترک کر کے صرف پاکستان کی ترقی و خوشحالی کے لیے مل کر کام کیا جائے اور اس عظیم وطن کا قرض فرض سمجھ کر ادا کیا جائے۔