انڈونیشیا میں حکومت کا مفت کھانا، تقریباً 800 افراد فوڈ پوائزننگ کا شکار

انڈونیشیا میں حکومت کے مفت کھانے فراہم کرنے کے اربوں ڈالر کے فلیگ شپ پروگرام سے منسلک فوڈ پوائزننگ کے مختلف واقعات میں تقریباً 800 افراد متاثر ہو گئے ہیں۔ پارلیمانی کمیشن برائے صحت کے رکن چارلس ہونورِس کے مطابق، رواں ہفتے مشرقی جاوا صوبے کے ضلع سیدوارجو میں 512 اور نگانجک میں 49 طلبہ جبکہ مغربی سُمترا کے خطے آگم میں 237 افراد زہریلا کھانا کھانے سے بیمار ہوئے۔ صدر پرابوو سوبیانتو کی جانب سے غذائی کمی دور کرنے کے لیے شروع کیا گیا یہ 12.94 ارب ڈالر کا منصوبہ انتظامی مسائل، کرپشن کے الزامات اور تکنیکی نقص نقائص کے باعث مسلسل تنازعات کا شکار ہے، جہاں غذائیت ایجنسی نے سیدوارجو کیس کے بعد متعلقہ کچن کو معطل کر دیا ہے۔ غیر سرکاری تنظیموں کے مطابق، اس اسکیم کے تحت اب تک ہزاروں افراد فوڈ پوائزننگ کا شکار ہو چکے ہیں، جبکہ سروے رپورٹ میں بھی عوامی اطمینان میں شدید کمی دیکھی گئی ہے۔