بھارت: یوٹیوبر نے فالوورز نہ ملنے پر 10 لاکھ روپے مالیت کا اسٹوڈیو جلا دیا

بھارت، جھارکھنڈ: ریاست جھارکھنڈ کے ضلع گڑھوا میں ایک 27 سالہ یوٹیوبر ودھایک پرجاپتی نے فالوورز حاصل کرنے میں ناکامی کے بعد شدید مایوسی میں آ کر اپنے گھر کے اسٹوڈیو کو آگ لگا دی۔

رپورٹ کے مطابق اسٹوڈیو میں موجود 10 لاکھ روپے سے زائد مالیت کا سامان جل گیا۔ پولیس اور پڑوسیوں نے بروقت کارروائی کرتے ہوئے یوٹیوبر کے خاندان کو بچا لیا۔

ودھایک پرجاپتی اپنی رہائش گاہ سے فلم ایڈیٹنگ اور ڈیجیٹل ورک اسٹوڈیو چلاتے تھے۔ پڑوسیوں نے بتایا کہ یوٹیوبر نے اسٹارڈم حاصل کرنے کی امید میں اپنی زمین بھی بیچ دی تھی لیکن فالوورز نہ ملنے کی وجہ سے وہ شدید ذہنی دباؤ کا شکار ہو گئے تھے۔

پولیس کے مطابق یوٹیوبر اسٹوڈیو کو آگ لگانے کے بعد فرار ہو گیا، لیکن رشتہ داروں نے اسے اگلی صبح تلاش کر کے محفوظ کر لیا۔ اب وہ ذہنی مسائل کے سبب زیرِ علاج ہیں۔