بھارتی پولیس کی بربریت کے باوجود مختلف شہروں میں نوجوانوں کا احتجاج جاری

تعلیمی نظام میں مبینہ بے ضابطگیوں اور پیپر لیکس کے معاملے پر مودی حکومت کے خلاف شروع ہونے والے احتجاجی مظاہرے دارالحکومت دہلی کے بعد اب تمام بھارتی ریاستوں تک پھیل چکے ہیں۔ بھارتی سکیورٹی فورسز کے شدید تشدد کے باوجود ہزاروں نوجوان سڑکوں پر موجود ہیں اور وزیراعظم نریندر مودی، وزیر داخلہ امت شاہ اور وزیر تعلیم دھرمندر پردھان سے استعفیٰ کا مطالبہ کر رہے ہیں۔

سوشل میڈیا پلیٹ فارم ‘ایکس’ پر وائرل ویڈیوز کے مطابق کیرالہ، اروناچل پردیش، تمل ناڈو، گوا، گجرات، بہار اور مغربی بنگال سمیت متعدد ریاستوں میں طلبہ نے احتساب کا مطالبہ کرتے ہوئے زبردست مظاہرے کیے ہیں۔ عالمی جریدے الجزیرہ کے مطابق طلبہ کی حمایت اور احتجاج میں شرکت پر بھارتی اپوزیشن رہنما راہول گاندھی کو بھی پولیس نے حراست میں لے لیا، جس کے بعد مختلف سیاسی جماعتوں کی جانب سے بھی حکومت کے خلاف مظاہرے تیز کر دیے گئے ہیں۔

کانگریس رہنما پریانکا گاندھی نے سکیورٹی فورسز کی جانب سے مظاہرین پر تشدد پر شدید تشویش کا اظہار کرتے ہوئے کہا کہ طلبہ پر لاٹھیاں برسائی جا رہی ہیں اور آنسو گیس کے شیل داغے جا رہے ہیں۔ انہوں نے الزام عائد کیا کہ طالبات کے ساتھ انتہائی غیر شائستہ سلوک کیا جا رہا ہے۔ اس موقع پر بھارتی پارلیمنٹ کے رکن ملکارجن کھرگے نے مودی کے طرزِ حکومت کو آمریت قرار دیا جبکہ کانگریس کے جنرل سیکرٹری کے سی وینوگوپال نے وزیر تعلیم کے فوری استعفیٰ کا مطالبہ کیا۔

دوسری جانب، انسانی حقوق کی عالمی تنظیم ‘ایمنسٹی انٹرنیشنل’ نے اپنے بیان میں کہا کہ نوجوانوں کے احتجاج اور ان پر ہونے والے پولیس تشدد کی تصاویر نے یہ ثابت کر دیا ہے کہ بھارت میں پُرامن اختلافِ رائے کو سختی سے دبایا جا رہا ہے۔