آئی ایم ایف سربراہ شہباز حکومت کی معاشی اصلاحات کی معترف

عالمی مالیاتی ادارے (آئی ایم ایف) کی منیجنگ ڈائریکٹر کرسٹالینا جورجیوا نے وزیراعظم شہباز شریف کی قیادت میں پاکستان میں جاری معاشی اصلاحات کی کھل کر تعریف کی ہے۔

عالمی اقتصادی فورم کے موقع پر گفتگو کرتے ہوئے کرسٹالینا جورجیوا نے کہا کہ وہ وزیراعظم شہباز شریف کا تہہ دل سے احترام کرتی ہیں اور یہ ان کی خاص پہچان ہے کہ وہ جس کام کا عزم کر لیتے ہیں، اسے مکمل کیے بغیر نہیں چھوڑتے۔

آئی ایم ایف کی منیجنگ ڈائریکٹر کا کہنا تھا کہ ان کی وزیراعظم شہباز شریف سے متعدد ملاقاتیں ہو چکی ہیں، جن میں پہلے سے طے شدہ معاشی اہداف کے حصول اور آئندہ ترقیاتی ترجیحات پر تفصیلی تبادلۂ خیال کیا جاتا ہے۔
انہوں نے کہا کہ پاکستانی حکومت سنجیدگی کے ساتھ اصلاحاتی ایجنڈے پر عملدرآمد کر رہی ہے۔

کرسٹالینا جورجیوا کے مطابق حکومتی اقدامات کے مثبت نتائج سامنے آنا شروع ہو چکے ہیں اور پہلی بار پاکستان میں واضح بجٹ نظم و ضبط دکھائی دے رہا ہے، جبکہ عوام کی زندگی میں بہتری لانے کے لیے وسائل مؤثر انداز میں استعمال کیے جا رہے ہیں۔