آئی ایم ایف اور پاکستان کے درمیان ورچوئل اقتصادی جائزہ مذاکرات جاری

پاکستان اور آئی ایم ایف کے درمیان ورچوئل اقتصادی جائزہ مذاکرات کا سلسلہ جاری ہے، جس میں توانائی کے شعبے میں اصلاحات اور مالیاتی نظم و ضبط پر تفصیلی بات چیت کی گئی۔ آج ہونے والی آن لائن میٹنگ میں بجلی اور گیس کے بلوں کے ذریعے ایف بی آر (FBR) کو ملنے والے ٹیکسز کے معاملے پر غور کیا گیا۔

ذرائع کے مطابق، آئی ایم ایف مشن نے صوبوں کی جانب سے پیش کردہ پی ایس ڈی پی (PSDP) اخراجات کی تفصیلات پر عدم اطمینان کا اظہار کیا ہے۔ مشن کا کہنا ہے کہ پہلے چھ ماہ کے دوران ترقیاتی اخراجات کی صورتحال بہتر نہیں رہی۔ آئی ایم ایف نے یہ اہم سوال بھی اٹھایا کہ اگر اگلے چھ ماہ میں پی ایس ڈی پی اخراجات میں اضافہ ہوتا ہے تو بجٹ میں ‘اکاؤنٹ سرپلس’ کا ہدف کیسے برقرار رکھا جائے گا۔

آج ایف بی آر کے ساتھ ہونے والی دوسری اہم میٹنگ میں ٹیکس شارٹ فال کو پورا کرنے کے متبادل طریقوں پر غور کیا جائے گا تاکہ ریونیو اہداف کو ہر صورت حاصل کیا جا سکے۔ آئی ایم ایف مشن توانائی کے شعبے میں گردشی قرضوں میں کمی اور ٹیکس نیٹ کو وسیع کرنے کے لیے مزید اقدامات کا مطالبہ کر رہا ہے۔