ایکسٹینڈڈ فنڈ فیسیلٹی کا چوتھا جائزہ، آئی ایم ایف مشن 23 ستمبر کو پاکستان پہنچے گا

بین الاقوامی مالیاتی فنڈ (آئی ایم ایف) کا ایک اہم وفد ایوا پیٹرووا (Eva Petrova) کی قیادت میں پاکستان کے ساتھ ایکسٹینڈڈ فنڈ فیسیلٹی (EFF) کے چوتھے اقتصادی جائزے کے لیے 23 ستمبر کو پاکستان کا دورہ کرے گا۔ ذرائع وزارتِ خزانہ کے مطابق آئی ایم ایف مشن کا یہ دورہ تقریباً دو ہفتے جاری رہے گا اور مذاکرات کا سلسلہ اکتوبر کے پہلے ہفتے تک چلے گا۔ تکنیکی بات چیت کا باقاعدہ آغاز اسٹیٹ بینک آف پاکستان سے ہوگا، جبکہ مشن وفاقی وزیرِ خزانہ محمد اورنگزیب اور ان کی معاشی ٹیم کے ساتھ حتمی سطح کے مذاکرات کرے گا۔

اس جائزے کی کامیاب تکمیل کی صورت میں پاکستان کو تقریباً 1 ارب ڈالر کی پیشگی قسط موصول ہونے کی توقع ہے، جبکہ ریزیلینس اینڈ سسٹین ایبلٹی فیسیلٹی (RSF) پروگرام کے تحت مزید 20 کروڑ ڈالر کی اضافی فنڈنگ کا امکان بھی ظاہر کیا جا رہا ہے۔ مذاکرات کے دوران فیڈرل بورڈ آف ریونیو (FBR) کے ٹیکس وصولیوں کے اہداف، صوبوں کی جانب سے وفاق کو 135 ارب روپے سے زائد کی منتقلی اور زرعی سیکٹر میں گندم و چینی آپریشنز پر حکومتی مداخلت کے خاتمے جیسے اہم امور سرِفہرست رہیں گے۔