اسلام آباد مفاہمت کی 7 شرائط پوری ہونے تک آبنائے ہرمز نہیں کھولی جائے گی: قالیباف

ایرانی پارلیمنٹ کے سپیکر اور چیف مذاکرات کار محمد باقر قالیباف نے پارلیمنٹ سے خطاب کرتے ہوئے انکشاف کیا ہے کہ امریکا نے ثالثوں کے ذریعے ایران کو کچھ نئی تجاویز پیش کی ہیں۔ انہوں نے دوٹوک الفاظ میں اعلان کیا کہ جب تک اسلام آباد مفاہمت کی یادداشت میں طے شدہ سات شرائط پوری نہیں کی جاتیں، آبنائے ہرمز کو نہیں کھولا جائے گا۔ باقر قالیباف کا کہنا تھا کہ وقت ضائع کرنے اور یکطرفہ مطالبات مسلط کرنے کا دور اب ختم ہو چکا ہے، اور ایران بیک وقت فوجی محاذ پر بھرپور طاقت کے ساتھ مقابلہ اور سفارتی سطح پر اپنے حقوق کے لیے جدوجہد جاری رکھے گا۔ انہوں نے واضح کیا کہ ایران اپنے قومی سلامتی کے فیصلے امریکی حکام کی سوشل میڈیا پوسٹس یا بیانات کی بجائے دشمن کے عملی اقدامات کو دیکھ کر کرتا ہے۔