اسلام آباد ہائیکورٹ کے 5 ججز کا بڑا قدم: وفاقی آئینی عدالت سے انٹراکورٹ اپیل واپس سپریم کورٹ بھیجنے کی درخواست

اسلام آباد ہائیکورٹ کے پانچ ججز نے 27ویں آئینی ترمیم اور اس کے تحت قائم کی گئی وفاقی آئینی عدالت کو غیرقانونی قرار دیتے ہوئے تین ججز کی اسلام آباد ہائیکورٹ میں ٹرانسفر اور سینیارٹی میں تبدیلی کے خلاف دائر اپنی انٹراکورٹ اپیل وفاقی آئینی عدالت سے واپس لینے اور اسے دوبارہ سپریم کورٹ بھیجنے کے لیے متفرق درخواست جمع کرادی ہے۔

درخواست میں مؤقف اختیار کیا گیا ہے کہ 27ویں ترمیم اور اس کے نتیجے میں قائم کی گئی وفاقی آئینی عدالت آئینی تقاضوں کے مطابق نہیں، لہٰذا اس کے پاس انٹراکورٹ اپیل کی سماعت کا اختیار بھی موجود نہیں۔ ججز نے مؤقف اپنایا کہ کیس آئینی نوعیت کا ہے اور اس پر اصل فورم یعنی سپریم کورٹ ہی فیصلہ کرنے کا دائرہ اختیار رکھتی ہے۔

وفاقی آئینی عدالت نے اس اپیل کی سماعت 24 نومبر کے لیے مقرر کر رکھی ہے، تاہم درخواست میں استدعا کی گئی ہے کہ کیس کو مقررہ تاریخ سے قبل ہی واپس لے کر سپریم کورٹ منتقل کیا جائے تاکہ معاملہ آئینی فورم پر ہی نمٹایا جا سکے۔