ٹی 20 ورلڈکپ: پاک بھارت میچ سے متعلق فیصلہ 12 فروری کو ہونے کا امکان

اسلام آباد: آئی سی سی ٹی 20 ورلڈ کپ 2026 میں پاکستان اور بھارت کے درمیان میچ کے حوالے سے حتمی فیصلہ ممکنہ طور پر 12 فروری کو کیا جائے گا۔ بھارتی میڈیا کے مطابق انٹرنیشنل کرکٹ کونسل (آئی سی سی) نے پاکستان کو 9 فروری تک جواب دینے کی ڈیڈ لائن دی تھی۔

ذرائع کے مطابق آج پاک بھارت میچ سے متعلق کوئی پیشرفت متوقع نہیں ہے، اور فیصلے کے لیے مزید وقت درکار ہے۔ دوسری جانب چیئرمین پاکستان کرکٹ بورڈ (پی سی بی) محسن نقوی کی وزیراعظم شہباز شریف سے ملاقات کا امکان ہے، جس میں وہ گزشتہ روز ہونے والے مذاکرات پر بریف کریں گے اور آئندہ کے لائحہ عمل کے لیے ہدایات لیں گے۔

ذرائع نے بتایا کہ میچ کھیلنے یا نہ کھیلنے کا حتمی فیصلہ وزیراعظم شہباز شریف کریں گے۔ گزشتہ شب آئی سی سی، پاکستان کرکٹ بورڈ اور بنگلہ دیش کرکٹ بورڈ کے درمیان مذاکرات ہوئے، جن میں پاک بھارت میچ اور خطے کی مجموعی کرکٹ صورتحال پر تفصیلی بات چیت کی گئی۔

واضح رہے کہ آئی سی سی وفد گزشتہ روز بھارت سے میچ کھیلنے کی درخواست لے کر لاہور پہنچا تھا۔ حکومت پاکستان کی ہدایت پر پی سی بی نے ٹی 20 ورلڈ کپ میں شرکت کرنے اور بھارت کے ساتھ میچ نہ کھیلنے کا فیصلہ کیا تھا۔