لارڈز اور قذافی اسٹیڈیم کی پچز غیر تسلی بخش قرار، آئی سی سی نے ایک، ایک ڈی میرٹ پوائنٹ جاری کر دیا

انٹرنیشنل کرکٹ کونسل نے لارڈز اور قذافی اسٹیڈیم کی پچز کو غیر تسلی بخش قرار دیتے ہوئے دونوں وینیوز کو ایک، ایک ڈی میرٹ پوائنٹ دے دیا ہے۔

آئی سی سی کے مطابق انگلینڈ اور نیوزی لینڈ کے درمیان ٹیسٹ میچ جبکہ پاکستان اور آسٹریلیا کے درمیان کھیلے گئے تیسرے ون ڈے میچ کی پچز پر میچ ریفریز نے تحفظات کا اظہار کیا تھا۔

لارڈز ٹیسٹ کے میچ ریفری اینڈی پائی کرافٹ کی رپورٹ میں کہا گیا کہ لارڈز کی پچ پر غیر معمولی سیم موومنٹ اور غیر متوقع باؤنس دیکھنے میں آیا، جس سے بیٹ اور بال کے درمیان توازن متاثر ہوا۔

دوسری جانب گریم لا بروئے کی رپورٹ کے مطابق قذافی اسٹیڈیم کی پچ سست اور کم باؤنس والی تھی، جس کے باعث رنز بنانا مشکل رہا۔ رپورٹ میں کہا گیا کہ پچ ون ڈے کرکٹ کے معیار پر پوری نہیں اتری جبکہ اسپنرز کو ابتدا سے ہی مدد ملتی رہی۔

آئی سی سی نے انگلینڈ اور ویلز کرکٹ بورڈ اور پاکستان کرکٹ بورڈ کو رپورٹس ارسال کر دی ہیں اور اپیل کے لیے چودہ روز کی مہلت دی گئی ہے۔

واضح رہے کہ لارڈز اور قذافی اسٹیڈیم کے خلاف اس سے قبل کوئی ڈی میرٹ پوائنٹ موجود نہیں تھا۔ آئی سی سی قوانین کے مطابق غیر تسلی بخش پچ پر ایک اور ناقابلِ کھیل پچ پر تین ڈی میرٹ پوائنٹس دیے جاتے ہیں، جبکہ چھ ڈی میرٹ پوائنٹس پر وینیو ایک سال اور بارہ ڈی میرٹ پوائنٹس پر دو سال کے لیے بین الاقوامی کرکٹ کی میزبانی سے محروم ہو سکتا ہے۔