آئی سی سی نے بنگلہ دیش کو ٹی 20 ورلڈ کپ سے باہر، سکاٹ لینڈ کو شامل کرلیا

انٹرنیشنل کرکٹ کونسل (آئی سی سی) نے بنگلہ دیش کو ٹی 20 ورلڈ کپ سے باہر کر دیا ہے جبکہ اس کی جگہ سکاٹ لینڈ کو ایونٹ میں شامل کر لیا گیا ہے۔ کرکٹ ویب سائٹ کے مطابق آئی سی سی نے بنگلہ دیش کے میچز منتقل کرنے اور معاملہ ڈسپوٹ ریزولوشن کمیٹی میں بھیجنے کی درخواست مسترد کر دی ہے۔

ذرائع کا کہنا ہے کہ آئی سی سی اس فیصلے کا باقاعدہ اعلان جلد کرے گا۔ ورلڈ کپ میں شرکت نہ کرنے کی صورت میں بنگلہ دیش کو تقریباً 350 کروڑ ٹکا کے مالی نقصان کا سامنا کرنا پڑے گا۔

آئی سی سی بورڈ میٹنگ میں بنگلہ دیش کرکٹ بورڈ کی درخواست ووٹنگ کے بعد مسترد کی گئی تھی۔ بھارتی میڈیا کے مطابق بھارت نے حکومتی دباؤ کے باعث بنگلہ دیش کے فاسٹ بولر مستفیض الرحمان کو آئی پی ایل سے نکال دیا تھا، جبکہ سکاٹ لینڈ کو گروپ سی میں شامل کر لیا گیا ہے۔

گروپ سی میں اب سکاٹ لینڈ کے ساتھ ویسٹ انڈیز، انگلینڈ، اٹلی اور نیپال شامل ہوں گے۔

آئی سی سی ذرائع کے مطابق جمعے کی شام بنگلہ دیش کرکٹ بورڈ کو باضابطہ ای میل ارسال کی گئی، جس میں بی سی بی کو 24 گھنٹے کا الٹی میٹم دیتے ہوئے متبادل ٹیم کے بارے میں آگاہ کیا گیا۔ ذرائع کے مطابق متبادل ٹیم کے شامل ہونے کی صورت میں ٹی 20 ورلڈ کپ سے حاصل ہونے والی آمدنی میں بنگلہ دیش کا حصہ بھی متبادل ٹیم کو منتقل کر دیا جائے گا۔

دوسری جانب بنگلہ دیش کرکٹ بورڈ نے معاملے پر آئی سی سی تنازعہ کمیٹی میں درخواست دائر کر رکھی ہے، تاہم تاحال اس درخواست کی سماعت کی تاریخ مقرر نہیں ہو سکی۔