آئی سی سی سالانہ کانفرنس 8 جولائی سے سکاٹ لینڈ میں ، اہم معاملات زیر غور آئینگے

انٹرنیشنل کرکٹ کونسل (آئی سی سی) کی اہم ترین سالانہ کانفرنس 8 سے 11 جولائی تک ایڈنبرا، اسکاٹ لینڈ میں منعقد ہونے جا رہی ہے، جس میں دنیا بھر سے رکن ممالک کے چیف ایگزیکٹوز اور بورڈ سربراہان شرکت کریں گے۔

ذرائع کے مطابق، آئی سی سی کی اس سالانہ کانفرنس کی صدارت چیئرمین جے شاہ کریں گے، جبکہ پاکستان کرکٹ بورڈ (پی سی بی) کے چیف آپریٹنگ آفیسر سُمیر احمد سید بھی اجلاس میں باقاعدہ طور پر پاکستان کی نمائندگی کے لیے موجود ہوں گے۔ ذرائع کا مزید کہنا ہے کہ پاکستان کرکٹ بورڈ کے چیئرمین محسن نقوی کی بھی اس اہم ترین بورڈ میٹنگ میں شرکت کا قوی امکان ہے۔

اس 4 روزہ کانفرنس کے دوران عالمی کرکٹ کے مستقبل کے حوالے سے کئی دور رس فیصلے متوقع ہیں۔ اجلاس کے ایجنڈے میں ٹیسٹ چیمپئن شپ 2027-29 کے مجوزہ فیوچر ٹورز پروگرام (ایف ٹی پی)، مختلف ممالک کے درمیان دوطرفہ سیریز، ون ڈے کرکٹ کے مستقبل اور دنیا بھر میں تیزی سے بڑھتے ہوئے فرنچائز ٹورنامنٹس سے متعلق اہم امور شامل ہیں، جن پر تمام کرکٹ بورڈز کے حکام تفصیلی تبادلہ خیال کریں گے۔