چین: ہوا جیانگ گرینڈ کینین پل نے دنیا کے بلند ترین پل کا اعزاز اپنے نام کرلیا

چین میں گزشتہ برسوں کے دوران ایسے متعدد تعمیراتی منصوبے مکمل کیے گئے ہیں جنہوں نے دنیا کو حیران کر دیا، تاہم ہوا جیانگ گرینڈ کینین برج ایک ایسا منفرد شاہکار ہے جسے انجینئرنگ کا غیر معمولی کارنامہ قرار دیا جا رہا ہے۔

یہ پل سطح زمین سے 625 میٹر کی بلندی پر واقع ہے، جس کے باعث اس پر سفر کرنا کمزور دل افراد کے لیے آسان نہیں۔ ستمبر 2025 میں عوام کے لیے کھولے جانے کے بعد اسے دنیا کا بلند ترین پل قرار دیا گیا۔

حالیہ طور پر عالمی جریدے ٹائم نے اسے 2026 کے بہترین مقامات میں پہلی پوزیشن پر رکھا ہے، جس کے بعد اس پل کی عالمی اہمیت مزید بڑھ گئی ہے۔

اس سے قبل فرانس کے میلاو ویاڈکٹ کو دنیا کا بلند ترین پل سمجھا جاتا تھا، تاہم چینی پل اس سے نمایاں طور پر زیادہ بلند ہے۔ یہ پل جنوب مغربی چین کے پہاڑی صوبے گویزہو میں تعمیر کیا گیا ہے، جہاں دشوار گزار راستوں کے باعث سفر میں طویل وقت درکار ہوتا تھا۔

نئے پل کی بدولت دو گھنٹوں کا سفر محض ایک منٹ میں طے ہونا ممکن ہو گیا ہے، جو اس منصوبے کی افادیت کو ظاہر کرتا ہے۔

اسٹیل سے تیار کیے گئے اس پل کی لمبائی 9482 فٹ ہے جبکہ اس کی تعمیر جنوری 2022 میں شروع ہوئی اور ستمبر 2025 میں مکمل ہوئی۔ اس منصوبے میں 20 ہزار ٹن اسٹیل استعمال کیا گیا جو تین ایفل ٹاورز کے برابر تصور کیا جاتا ہے۔