یمنی حوثیوں نے الحدیدہ پر حملے کے بعد سعودی شہر جازان پر میزائل داغ دیا

یمن کے حوثی باغیوں نے سعودی عرب کے شہر جازان پر میزائل حملے کا دعویٰ کیا ہے، جس کے نتیجے میں علاقے میں آگ بھڑک اٹھی۔ حوثیوں کا یہ ردِعمل الحدیدہ اور کمران جزیرے میں سعودی فضائی حملوں کے بعد سامنے آیا، جس میں 2 افراد زخمی ہوئے تھے۔ دوسری جانب حوثیوں نے بحیرۂ احمر میں سعودی جہازوں کے خلاف ناکہ بندی کا اعلان کرتے ہوئے 2 جہازوں پر حملوں کی ذمہ داری قبول کی ہے۔ اس صورتحال پر امریکی صدر ڈونلڈ ٹرمپ نے کہا ہے کہ ایران کے خلاف بڑے پیمانے پر حتمی فوجی کارروائی کا فیصلہ نہیں ہوا کیونکہ تہران مذاکرات میں سنجیدگی دکھا رہا ہے، تاہم انہوں نے واضح کیا کہ ایران کو کسی صورت جوہری ہتھیار بنانے یا آبنائے ہرمز بند کرنے کی اجازت نہیں دی جائے گی۔ اسی دوران ایرانی فوج نے بحرین، اردن اور کویت میں امریکی فوجی اڈوں اور ڈیٹا سینٹر کو نشانہ بنانے کا دعویٰ کیا ہے، جس کی امریکی حکام کی جانب سے تصدیق نہیں کی گئی۔