شرجیل انعام میمن سے ایشین ڈویلپمنٹ بینک کے اعلیٰ سطحی وفد کی ملاقات

سندھ کے سینئر وزیر برائے ٹرانسپورٹ شرجیل انعام میمن سے ایشین ڈویلپمنٹ بینک (اے ڈی بی) کے اعلیٰ سطحی وفد نے ملاقات کی، جس میں ٹرانسپورٹ کے جاری اور مستقبل کے منصوبوں پر تفصیلی تبادلہ خیال کیا گیا۔ ملاقات میں سیکریٹری ٹرانسپورٹ اسد ضامن اور سی ای او ٹرانس کراچی فواد غفار سومرو بھی شریک تھے۔

اے ڈی بی کے وفد نے سندھ حکومت کے ٹرانسپورٹ منصوبوں کے لیے مکمل مالی معاونت کی یقین دہانی کراتے ہوئے کہا کہ مستقبل میں بھی ٹرانسپورٹ سیکٹر کے مزید منصوبوں میں تکنیکی و مالی تعاون جاری رکھا جائے گا۔

شرجیل انعام میمن نے وفد کو بتایا کہ حکومت سندھ پاکستان میں پہلی مرتبہ بایو گیس سے چلنے والی بسیں متعارف کرانے جا رہی ہے۔ ان کا کہنا تھا کہ کراچی کے لیے بایو گیس پر چلنے والی جدید بسوں کی خریداری کا باضابطہ آغاز کر دیا گیا ہے۔

انہوں نے کہا کہ صوبائی حکومت کی ترجیح ہے کہ نہ صرف بسوں کا معیار جدید ہو بلکہ سروس بھی بین الاقوامی معیار کے مطابق فراہم کی جائے۔ ان کے مطابق یہ بسیں ماحول دوست ہونے کے ساتھ ساتھ انٹیلیجنٹ ٹرانسپورٹ سسٹم (ITS) سے بھی لیس ہوں گی۔

شرجیل انعام میمن نے مزید بتایا کہ کراچی میں بایو گیس پلانٹ منصوبے پر جلد کام شروع کر دیا جائے گا۔ ان کے مطابق بایو گیس پلانٹ اور الیکٹرک گاڑیوں جیسے اقدامات ماحول دوست ٹرانسپورٹ کے فروغ اور ماحولیاتی آلودگی میں نمایاں کمی کا سبب بنیں گے۔