این ڈی ایم اے ہیڈکوارٹر میں ترک وزیر داخلہ کی قیادت میں اعلیٰ سطح وفد کا دورہ

اسلام آباد میں نیشنل ایمرجنسیز آپریشن سینٹر (این ڈی ایم اے) ہیڈکوارٹر کا اعلیٰ سطح ترک وفد نے دورہ کیا۔ وفد کی قیادت ترکیہ کے وزیر داخلہ علی یرلیکایا نے کی، جبکہ ترکیہ نیشنل ڈیزاسٹر مینجمنٹ کے صدر علی حمزہ پہلوان بھی وفد کے ہمراہ تھے۔

وزیرِ مملکت برائے داخلہ طلال چوہدری نے ترک وفد کے ہمراہ این ڈی ایم اے کا دورہ کیا، جہاں چیئرمین این ڈی ایم اے لیفٹیننٹ جنرل انعام حیدر ملک نے وفد کا استقبال کیا۔

ترک وفد کو این ڈی ایم اے کے جدید ٹیکنالوجی پر مبنی نظام، پیشگی آگاہی کے طریقہ کار اور آفات سے نمٹنے کی حکمتِ عملی پر تفصیلی بریفنگ دی گئی۔

دورے کے دوران پاکستان اور ترکیہ کے درمیان قدرتی آفات سے نمٹنے کے لیے مشترکہ پاک-ترکیہ سینٹر کے قیام پر اتفاق کیا گیا۔ یہ جدید ٹیکنالوجی پر مبنی سینٹر نیشنل ایمرجنسیز آپریشن سینٹر سے منسلک ہوگا۔

ترک وزیر داخلہ علی یرلیکایا نے این ڈی ایم اے کی مؤثر کارکردگی، جدید تیاریوں اور آفات سے نمٹنے کے فعال نظام کی تعریف کی۔

اس موقع پر دونوں ممالک نے فلاحی اقدامات میں باہمی اشتراک اور استعدادِ کار بڑھانے کے عزم کا اعادہ کیا۔

چیئرمین این ڈی ایم اے لیفٹیننٹ جنرل انعام حیدر ملک نے ترکیہ کی مسلسل امداد اور تعاون پر شکریہ ادا کیا اور کہا کہ پاکستان اور ترکیہ خطے میں ماحولیاتی آفات کے خلاف مشترکہ اقدامات جاری رکھیں گے۔