خود کو اسرائیل کیخلاف ’طویل جنگ‘ کیلئے تیار کر لیا ہے، حزب اللہ رہنما نعیم قاسم

لبنان کی مزاحمتی تنظیم حزب اللہ کے رہنما نعیم قاسم نے اسرائیل کے خلاف اپنی حکمتِ عملی واضح کرتے ہوئے کہا ہے کہ تنظیم نے خود کو ایک “طویل جنگ” کے لیے مکمل طور پر تیار کر لیا ہے۔ ٹی وی پر اپنے خطاب کے دوران انہوں نے خبردار کیا کہ صیہونی ریاست کو میدانِ جنگ میں ایسی “حیرتوں” کا سامنا کرنا پڑے گا جس کا اس نے تصور بھی نہیں کیا ہوگا۔

واضح رہے کہ 2 مارچ سے دونوں جانب سے حملوں کا سلسلہ شدت اختیار کر چکا ہے۔ حزب اللہ نے ایرانی رہبرِ اعلیٰ آیت اللہ علی خامنہ ای کی وفات کے بعد اسرائیل پر بڑے پیمانے پر فضائی حملے کیے، جس کے جواب میں اسرائیل لبنان کے مختلف علاقوں پر بھاری بمباری کر رہا ہے۔ اسرائیل کا دعویٰ ہے کہ وہ صرف حزب اللہ کے عسکری ٹھکانوں کو نشانہ بنا رہا ہے، تاہم اس کشیدگی نے پورے خطے میں ایک بڑے بحران کی صورت اختیار کر لی ہے۔ نعیم قاسم کے حالیہ بیان سے ظاہر ہوتا ہے کہ حزب اللہ دفاعی پوزیشن کے بجائے اب جارحانہ اور طویل المدتی جنگ کے لیے پرعزم ہے۔