احتجاجی تحریک تیز، ضرورت پڑی تو دھرنا طویل کریں گے: حافظ نعیم الرحمان

امیر جماعت اسلامی پاکستان حافظ نعیم الرحمان نے اعلان کیا ہے کہ جماعت اسلامی نے عوامی حقوق کے حصول کے لیے اپنی احتجاجی تحریک تیز کر دی ہے اور اگر ضرورت پڑی تو جاری دھرنوں کا دورانیہ مزید طویل کیا جائے گا۔

صوبائی دارالحکومت میں دھرنے کے شرکا سے خطاب کرتے ہوئے حافظ نعیم الرحمان کا کہنا تھا کہ اس وقت کراچی کے ساحلوں سے لے کر لاہور اور ملک کے دیگر تمام بڑے شہروں میں سیکڑوں مقامات پر عوام سڑکوں پر سراپا احتجاج ہیں۔ انہوں نے حکومت کو آڑے ہاتھوں لیتے ہوئے کہا کہ پٹرولیم مصنوعات پر عائد بھاری لیوی، ٹیکسوں کی بھرمر اور مسلسل بڑھتی ہوئی مہنگائی نے عام آدمی کی زندگی اجیرن کر دی ہے۔ عالمی منڈی میں خام تیل کی قیمتیں کم ہونے کے باوجود عوام کو مہنگا پٹرول فروخت کر کے لیوی کی مد میں اربوں روپے بٹورے جا رہے ہیں۔

امیر جماعت اسلامی نے زور دے کر کہا کہ موجودہ معاشی نظام عوامی مسائل کا حل فراہم کرنے میں مکمل طور پر ناکام ہو چکا ہے، لہٰذا حکمران اپنی عوام دشمن پالیسیوں پر فوری نظرثانی کریں۔ انہوں نے مطالبہ کیا کہ پٹرولیم لیوی کا خاتمہ کیا جائے اور غریب، مزدور، کسان، طلبہ اور متوسط طبقے کو معاشی ریلیف دیا جائے۔ حافظ نعیم الرحمان نے واضح کیا کہ جماعت اسلامی کی تحریک مطالبات کی منظوری تک جاری رہے گی، جبکہ انہوں نے کارکنان کو نظم و ضبط برقرار رکھنے اور ایمبولینسز کے لیے راستہ ہمیشہ کھلا رکھنے کی سخت ہدایت بھی کی۔