گل پلازہ سانحے میں بڑی پیش رفت، مقدمہ غفلت اور لاپرواہی کے تحت درج

کراچی: گل پلازہ میں آگ لگنے کے واقعے کے سلسلے میں نبی بخش تھانے کی پولیس نے مقدمہ درج کر کے ایف آئی آر سیل کر دی ہے۔ مقدمہ غفلت اور لاپرواہی کی دفعات کے تحت سرکار کی مدعیت میں درج کیا گیا ہے۔

ایف آئی آر کے متن کے مطابق گل پلازہ میں آگ لگنے کے واقعے میں شدید غفلت اور لاپرواہی کا مظاہرہ کیا گیا، جبکہ حفاظتی اقدامات نہ ہونے اور لائٹس بند ہونے کے باعث لوگوں کو شدید مشکلات کا سامنا کرنا پڑا۔ کئی داخلی اور خارجی راستے بند تھے، جس سے صورتحال مزید خراب ہو گئی۔

اعلیٰ پولیس حکام کا کہنا ہے کہ تحقیقاتی رپورٹ موصول ہونے کے بعد ذمہ داران کے نام مقدمے میں شامل کیے جائیں گے اور قانون کے مطابق کارروائی عمل میں لائی جائے گی۔

یہ ایف آئی آر گل پلازہ سانحے میں اب تک کی سب سے بڑی پیش رفت کے طور پر دیکھی جا رہی ہے۔