سانحہ گل پلازہ: ڈی این اے کے ذریعے مزید 3 لاشوں کی شناخت مکمل

کراچی کے افسوسناک سانحہ گل پلازہ میں مجموعی طور پر 73 افراد جاں بحق ہو چکے ہیں، جبکہ لاشوں کی شناخت کا عمل جامعہ کراچی کے انٹرنیشنل سینٹر فار کیمیکل اینڈ بایولوجیکل سائنسز (آئی سی سی بی ایس) کی فارینسک ڈی این اے لیبارٹری میں جاری ہے۔

لیب حکام کے مطابق تازہ ڈی این اے تجزیے کے نتیجے میں مزید 3 لاشوں کی شناخت کر لی گئی ہے، جس کے بعد اب تک شناخت ہونے والی لاشوں کی مجموعی تعداد 19 ہو گئی ہے۔

ڈی این اے لیبارٹری کو اب تک 48 لاشوں کے سیمپلز موصول ہو چکے ہیں، جبکہ 56 لواحقین نے ریفرنس نمونے فراہم کیے ہیں۔ ڈی این اے ٹیسٹنگ کے دوران مجموعی طور پر 24 سیمپلز کا میچ کیا گیا، تاہم 4 نمونے انسانی باقیات کی تکرار کے باعث شامل نہیں کیے گئے۔

لیب حکام کا کہنا ہے کہ ایک ایسی لاش بھی شناخت کے مرحلے میں شامل ہو گئی ہے جس کا ابتدائی طور پر کوئی ریفرنس میچ نہیں ہو سکا تھا، بعد ازاں ریفرنس سیمپل موصول ہونے پر اس کی شناخت ممکن بنائی گئی۔