گوگل کا سکولوں میں اے آئی اور سرچ سروسز سے متعلق نئی پالیسی متعارف

عالمی ٹیکنالوجی جائنٹ ‘گوگل’ (Google) نے اسکولوں میں زیرِ تعلیم طلبہ کے لیے مصنوعی ذہانت (AI) اور سرچ سروسز کے استعمال کو منظم بنانے سے متعلق ایک جامع اور نئی پالیسی متعارف کرانے کا فیصلہ کر لیا ہے۔

برطانوی خبر رساں ادارے کی عالمی رپورٹ کے مطابق اس نئی پالیسی کا باضابطہ اطلاق اسکولوں کے زیرِ انتظام پہلی سے بارہویں جماعت (K-12) تک کے طلبہ کے تمام اکاؤنٹس پر ہوگا۔ پالیسی کے تحت ابتدائی طور پر گوگل کے ایڈوانسڈ اے آئی ٹولز جیسے جیمنائی (Gemini)، نوٹ بک ایل ایم (NotebookLM) اور بنیادی گوگل سرچ ڈائریکٹ بند رکھی جائیں گی، تاہم اسکول انتظامیہ کو یہ کامل اختیار حاصل ہوگا کہ وہ اپنی صوابدید پر ان سہولیات کو فعال یا غیر فعال کر سکیں۔ گوگل نے یہ اقدام تعلیمی اداروں میں بالخصوص مصنوعی ذہانت کے تیزی سے بڑھتے استعمال اور اس پر سامنے آنے والے تحفظات کے بعد اٹھایا ہے۔

رپورٹ کے مطابق ان نئی تبدیلیوں کا باضابطہ نفاذ 2027ء کے اوائل میں شروع ہونے کا امکان ہے۔ پالیسی کا ایک اہم پہلو یہ ہے کہ جو اسکول طلبہ کے لیے اے آئی ٹولز کی سہولت فعال نہیں کریں گے، وہاں گوگل سرچ کی روایتی سہولت بھی فراہم نہیں کی جائے گی۔ تعلیمی ماہرین کے مطابق ٹولز کو محدود یا کھلی رسائی دینے کے فیصلے کے ساتھ ساتھ طلبہ کے ڈیٹا اور پرائیویسی کا تحفظ یقینی بنانا انتہائی ضروری ہے تاکہ یہ ٹیکنالوجی ان کی تنقیدی سوچ اور تحقیقی صلاحیتوں کو متاثر کرنے کے بجائے مزید جلا بخش سکے۔