آبنائے ہرمز مذاکرات کے بعد عالمی منڈی میں تیل کی قیمتوں میں مسلسل کمی

ایران اور عمان کے درمیان آبنائے ہرمز کے ذریعے عارضی بحری راستہ قائم کرنے کے فریم ورک پر بات چیت کے بعد عالمی منڈی میں خام تیل کی قیمتوں میں مسلسل تیسرے روز کمی ریکارڈ کی گئی ہے۔ رپورٹس کے مطابق مذاکرات کی پیش رفت سے عالمی سطح پر تیل کی سپلائی متاثر ہونے کے خدشات کم ہوئے ہیں، جس کے نتیجے میں برینٹ کروڈ کی قیمت 86.28 ڈالر فی بیرل جبکہ امریکی خام تیل (WTI) کی قیمت 80.29 ڈالر فی بیرل پر بند ہوئی۔ تجزیہ کاروں کے مطابق آبنائے ہرمز عالمی توانائی کی تجارت کی اہم گزرگاہ ہے اور اس کے ذریعے بحری آمدورفت کو ممکن بنانے کے امکانات سے سرمایہ کاروں میں یہ امید پیدا ہوئی ہے کہ کشیدگی کے باوجود عالمی تیل کی سپلائی کی روانی برقرار رہے گی۔