گیزہ کے عظیم ہرم کی تعمیر کا راز کھل گیا، سائنسدانوں نے رازوں سے پردہ ہٹادیا

مصر کے گیزہ میں واقع عظیم ہرم، ہرم خوفو، صدیوں سے تاریخ کے سب سے بڑے معمہ میں شمار ہوتا رہا ہے۔ سائنسدانوں نے اب اس کے ممکنہ تعمیراتی راز کا پتہ لگانے میں کامیابی حاصل کی ہے۔

تحقیق کے مطابق یہ ہرم اندرونی پلی سسٹم کی مدد سے تعمیر کیا گیا، جس نے بھاری پتھروں کو حیران کن رفتار سے اوپر اٹھانے میں مدد دی۔ جرنل نیچر کمیونیکیشنز میں شائع تحقیق میں بتایا گیا کہ مزدور ایک منٹ میں ایک بلاک نصب کرنے کے قابل تھے، جو روایتی طریقہ سے ممکن نہیں تھا۔

ماہرین کا کہنا ہے کہ ہرم کے اندر موجود ڈھلوانیں اور کاؤنٹر ویٹ سسٹمز پتھروں کو اوپر کھینچنے میں مددگار ثابت ہوئے۔ اس سے عندیہ ملتا ہے کہ ہرم کو بنیادی طور پر اندر سے تعمیر کیا گیا، نہ کہ بیرونی ریمپس پر انحصار کرتے ہوئے۔

قبل ازیں مئی 2024 میں محققین نے صحرا کے نیچے دریائے نیل کی خفیہ شاخ دریافت کی تھی، جس سے یہ واضح ہوا کہ ہزاروں سال قبل اہرام کی تعمیر کے لیے بھاری پتھروں کو وہاں تک کیسے پہنچایا گیا۔ اس دریائی راستے کی موجودگی نے یہ سوال بھی حل کیا کہ اہرام مختلف مقامات پر کیوں تعمیر کیے گئے۔

گیزہ کے عظیم ہرم کی تعمیر میں تقریباً 23 لاکھ بلاکس استعمال ہوئے، جن کا وزن 2.5 سے 15 ٹن کے درمیان تھا، اور یہ ہرم دنیا کے سات قدیم عجائب میں واحد موجودہ عجوبہ ہے۔