بورڈ آف پیس نے غزہ میں جنگ بندی پر عملدرآمد کا روڈ میپ جاری کردیا

غزہ میں قائمِ امن کے لیے تشکیل دیے گئے بورڈ آف پیس نے جنگ بندی اور مکمل امن کے قیام کے لیے ایک جامع روڈ میپ جاری کر دیا ہے، جس کے تحت اگلے 14 روز کے اندر منصوبے پر مرحلہ وار عمل درآمد کے لیے حتمی ٹائم فریم تیار کیا جائے گا۔ عرب میڈیا کے مطابق تمام فریقوں نے امریکی صدر ڈونلڈ ٹرمپ کے پیش کردہ امن منصوبے کی حمایت کرتے ہوئے غزہ سے اسرائیلی افواج کے مرحلہ وار انخلا، معمولاتِ زندگی کی بحالی، تعمیرِ نو اور فلسطینی انتظامی ڈھانچے کے قیام پر اتفاق کیا ہے۔ روڈ میپ کے تحت ایک قومی کمیشن اور بین الاقوامی فورسز کی آمد کے بعد 14 روز کے اندر طے شدہ میکانزم کے تحت بھاری ہتھیار قومی کمیشن کی تحویل میں دیے جائیں گے، تاہم یہ واضح کیا گیا ہے کہ کوئی بھی ہتھیار اسرائیل یا کسی غیر فلسطینی گروہ کے سپرد نہیں کیا جائے گا۔ بورڈ آف پیس کے مطابق شرم الشیخ پروٹوکول پر عمل درآمد اور ہتھیاروں کی تحویل کا یہ جامع منصوبہ بالآخر آزاد فلسطینی ریاست کے قیام کی راہ ہموار کرے گا۔