فرانس میں 15 سال سے کم عمر بچوں پر سوشل میڈیا کے استعمال کی پابندی عائد

فرانس کی پارلیمنٹ نے بچوں کے لیے سوشل میڈیا کے استعمال سے متعلق ایک اہم اور تاریخی فیصلہ کرتے ہوئے 15 سال سے کم عمر بچوں کے لیے سوشل میڈیا پر پابندی کا قانون منظور کر لیا ہے۔ بین الاقوامی میڈیا رپورٹس کے مطابق اس قانون پر باضابطہ عمل درآمد جنوری 2027ء سے ہوگا، جس کے بعد کم عمر بچوں کے لیے سوشل میڈیا کے اکاؤنٹس بنانا یا استعمال کرنا ممکن نہیں رہے گا۔ اس قدم کے ساتھ فرانس بچوں کی سوشل میڈیا تک رسائی محدود کرنے والا پہلا یورپی ملک بن جائے گا۔

منظور کیے گئے قانون کے تحت اب فرانس میں سوشل میڈیا پلیٹ فارمز کے تمام صارفین کے لیے اپنی عمر کی تصدیق (Age Verification) کرنا لازمی ہوگا تاکہ کم عمر بچوں کی رسائی کو مؤثر طریقے سے روکا جا سکے۔ رپورٹس کے مطابق یہ سخت فیصلہ سوشل میڈیا کے باعث بچوں کی ذہنی صحت، نیند اور ان کی نشوونما پر پڑنے والے شدید منفی اثرات کے خدشات کو مدنظر رکھتے ہوئے کیا گیا ہے۔ دوسری جانب فرانس کے اس اقدام کے بعد برطانیہ اور یورپی یونین کے دیگر ممالک بھی اپنے ہاں اسی قسم کی پابندیاں عائد کرنے پر غور کر رہے ہیں۔