کے ایم سی کی عمارت میں آتشزدگی، میئر کراچی کا دفتر مکمل طور پر جل گیا

کراچی: ایم اے جناح روڈ پر واقع کراچی بلدیہ عظمیٰ (کے ایم سی) کی تاریخی عمارت میں اچانک آگ بھڑک اٹھی، جس کے نتیجے میں میئر کراچی کا دفتر مکمل طور پر جل گیا۔

فائر بریگیڈ حکام کے مطابق آگ میئر کراچی کے دفتر سے متصل کچن میں لگی جس نے دیکھتے ہی دیکھتے ساتھ واقع میئر کے مرکزی دفتر کو بھی اپنی لپیٹ میں لے لیا۔ اطلاع ملتے ہی فائر بریگیڈ کے عملے نے 3 فائر ٹینڈرز کی مدد سے موقع پر پہنچ کر آگ پر قابو پا لیا۔ ریسکیو حکام نے تصدیق کی ہے کہ واقعے کے دوران تمام افراد کو بروقت باہر نکال لیا گیا جس سے کوئی جانی نقصان نہیں ہوا، تاہم آتشزدگی کی حتمی وجوہات فوری طور پر معلوم نہیں ہو سکی ہیں۔

واضح رہے کہ کراچی میں آتشزدگی کا یہ دوسرا بڑا واقعہ ہے؛ اس سے قبل گزشتہ روز لانڈھی ایکسپورٹ پروسیسنگ زون میں واقع ایک کپڑے کی فیکٹری میں بھی خوفناک آگ لگ گئی تھی جس سے کروڑوں روپے کا سامان جل کر راکھ ہو گیا، جبکہ ریسکیو حکام نے فیکٹری کی متاثرہ عمارت کو ناقابلِ استعمال اور مخدوش قرار دے دیا ہے۔