فن لینڈ کا روسی کھلاڑیوں سمیت شہریوں کے ملک میں داخلے پر پابندیاں عائد کرنے کا فیصلہ

فن لینڈ کی حکومت نے روسی شہریوں کے ملک میں داخلے سے متعلق نئی پابندیاں عائد کرنے کا فیصلہ کیا ہے جن کا اطلاق 16 نومبر 2026ء سے ہوگا۔ حکومتی فیصلے کے تحت روسی کھلاڑیوں سمیت مختصر مدت کے لیے کام کی غرض سے فن لینڈ آنے والے دیگر روسی شہریوں کا داخلہ بھی محدود کر دیا جائے گا، کیونکہ فن لینڈ کے مطابق روسی کھلاڑیوں کی آمد سے اس کے بین الاقوامی تعلقات متاثر ہونے کا خدشہ ہے۔ قبل ازیں فن لینڈ کی وزیر خارجہ ایلینا والٹونن نے گزشتہ ہفتے اس پالیسی میں ترمیم کا اعلان کیا تھا جسے آخری مرتبہ 2023ء کے موسم گرما میں اپ ڈیٹ کیا گیا تھا۔ واضح رہے کہ فن لینڈ پہلے ہی روسی شہریوں کے غیر ضروری سفر پر پابندیاں عائد کر چکا ہے، تاہم مستقل رہائش پذیر روسی شہریوں کے اہل خانہ، ٹرانسپورٹ ورکرز، کاروباری افراد اور اپنے ملکیتی اثاثوں کی دیکھ بھال کے لیے آنے والے افراد کو بدستور استثنیٰ حاصل رہے گا۔