یو اے ای اور یورو بانڈز کی ری پیمنٹ کیلئے انتظامات کر لئے گئے: وزیر خزانہ

وفاقی وزیرِ خزانہ محمد اورنگزیب نے میڈیا سے غیر رسمی گفتگو کرتے ہوئے ملک کی معاشی سمت اور مستقبل کے اہداف کے حوالے سے اہم تفصیلات فراہم کی ہیں۔ وزیرِ خزانہ کے مطابق یو اے ای اور یورو بانڈز کی ری پیمنٹ (قرضوں کی واپسی) کے لیے تمام ضروری انتظامات مکمل کر لیے گئے ہیں اور پاکستان اپنی تمام عالمی ادائیگیوں کے وعدے بروقت پورے کرے گا۔ انہوں نے انکشاف کیا کہ حکومت ایک ارب ڈالر مالیت کے ‘پانڈا بانڈز’ جاری کرنے کا منصوبہ رکھتی ہے، جس کے لیے اپریل کے اختتام سے دوبارہ تیاریاں شروع کی جا رہی ہیں۔ محمد اورنگزیب نے مزید بتایا کہ کمرشل فنانسنگ کے لیے بینکوں کے کنسورشیم سے بات چیت جاری ہے اور زرمبادلہ کے ذخائر کو آئی ایم ایف کے اہداف کے مطابق مستحکم رکھا جائے گا۔ انہوں نے واضح کیا کہ خطے کی کشیدہ صورتحال کے ملکی معیشت پر اثرات کا جائزہ لیا جا رہا ہے اور آئندہ مالی سال کے بجٹ کی تیاریاں بھی شروع کر دی گئی ہیں تاکہ آئی ایم ایف کے ساتھ مل کر معیشت کو درست سمت میں گامزن رکھا جا سکے۔