شمالی قبرص کے قریب مسافر فیری الٹ گئی، 8 افراد ہلاک، 17 لاپتا

شمالی قبرص کے شہر کرینیا سے ترکیہ کی بندرگاہ تاسوچو جانے والی ایک نجی فیری روانگی کے کچھ ہی دیر بعد سمندر میں الٹ گئی، جس کے نتیجے میں کم از کم 8 افراد ہلاک اور 17 لاپتہ ہو گئے ہیں۔ فیری میں 259 مسافر اور عملے کے 8 ارکان سوار تھے۔ حادثے کے فوراً بعد ساحلی محافظوں، ہیلی کاپٹروں اور نجی کشتیوں نے بڑے پیمانے پر امدادی کارروائی شروع کی اور متعدد افراد کو بحفاظت نکال لیا۔ زندہ بچ جانے والے مسافروں کے مطابق فیری غیر معمولی انداز میں حرکت کر رہی تھی اور پانی سے شدید ٹکرانے کے بعد اس کا اگلا حصہ متاثر ہوا جس سے پانی اندر داخل ہو گیا۔ حادثے کے بعد فیری تقریباً 514 میٹر گہرائی میں ڈوب گئی۔ شمالی قبرص کے حکام نے کپتان اور عملے کو حراست میں لے کر تحقیقات کا آغاز کر دیا ہے جبکہ ملک میں 3 روزہ سوگ کا اعلان کیا گیا ہے