وفاقی حکومت کا پنجاب کا ای بز پورٹل اسلام آباد میں نافذ کرنے کا فیصلہ

وفاقی حکومت نے پنجاب حکومت اور خصوصی سرمایہ کاری سہولت کونسل (SIFC) کے باہمی تعاون سے پنجاب کے کامیاب ‘ای بز پورٹل’ (e-Biz Portal) کو اسلام آباد میں نافذ کرنے کا اصولی فیصلہ کیا ہے۔ وزیراعظم شہباز شریف اور وزیراعلیٰ پنجاب مریم نواز شریف کی منظوری کے بعد چیف سیکرٹری پنجاب اور سیکرٹری ایس آئی ایف سی کی ملاقات میں منصوبے کو حتمی شکل دی گئی۔ وزیراعظم کی ہدایت پر دسمبر 2026ء تک وفاقی دارالحکومت کے کاروباری سہولت مرکز میں اس پورٹل کو فعال کرنے کا ہدف مقرر کیا گیا ہے، جس کے لیے پنجاب انفارمیشن ٹیکنالوجی بورڈ (PITB) اور ایس آئی ایف سی مشترکہ طور پر کام کریں گے۔ ای بز پورٹل ایک ڈیجیٹل سسٹم ہے جو کاروبار کے آغاز اور تمام تر سرکاری اجازت ناموں کو ایک ہی پلیٹ فارم پر لانے کی سہولت فراہم کرتا ہے۔