کراچی پورٹ پر عالمی جہازوں کیلئے تاریخی مراعات: وفاقی حکومت کا پورٹ چارجز میں 60 فیصد تک رعایت کا اعلان

اسلام آباد/کراچی: وفاقی حکومت نے پاکستان کی بندرگاہوں کو عالمی شپنگ کے لیے کم لاگت اور مؤثر تجارتی گزرگاہ بنانے کے لیے ایک بڑے مالیاتی مراعاتی پیکج کا اعلان کر دیا ہے۔ وفاقی وزیر بحری امور محمد جنید انوار چوہدری کی زیر صدارت منعقدہ اہم اجلاس میں کراچی پورٹ ٹرسٹ (KPT) کے لیے خصوصی ڈسکاؤنٹ اسکیم کی منظوری دی گئی، جس کا نفاذ 18 مارچ 2026 سے کر دیا گیا ہے۔

نئی اسکیم کے تحت ڈرائی بلک ایکسپورٹ کارگو پر ڈیوٹی اور چارجز میں 60 فیصد تک کی نمایاں کمی کی گئی ہے۔ وزیر بحری امور نے ٹرانس شپمنٹ کارگو کے لیے کم از کم شرط کو 10 فیصد سے کم کر کے 7.5 فیصد کرنے کا اعلان کیا، جبکہ بیس ڈسکاؤنٹ کو 5 فیصد سے بڑھا کر 20 فیصد کر دیا گیا ہے۔ مزید برآں، اضافی کارگو لانے والے جہازوں کو مزید 5 فیصد رعایت دی جائے گی۔

وزیر بحری امور کا کہنا تھا کہ زیادہ جہاز لانے والی شپنگ لائنز اور بڑے کنٹینر جہازوں کو ویٹ چارجز میں 50 فیصد تک چھوٹ دی جائے گی۔ عالمی ماحولیاتی اہداف کو مدنظر رکھتے ہوئے ‘گرین شپنگ’ کو بھی فروغ دیا جا رہا ہے، جس کے تحت ماحول دوست ایندھن استعمال کرنے والے جہازوں کو اضافی 5 فیصد رعایت ملے گی۔ 50 فیصد جی آر ٹی (GRT) ٹرانس شپمنٹ کارگو پر 60 فیصد فلیٹ رعایت مقرر کی گئی ہے تاکہ کراچی پورٹ کو خطے میں ایک مسابقتی تجارتی مرکز بنایا جا سکے۔