ایف بی آئی کی بڑی کامیابی: 54 ارب روپے کے میڈیکئیر اسکینڈل کا مرکزی ملزم مشرقِ وسطیٰ سے گرفتار

امریکی تحقیقاتی ادارے ایف بی آئی (FBI) نے دھوکہ دہی اور فراڈ کی فہرست میں شامل انتہائی مطلوب فراری کو بین الاقوامی سرچ آپریشن کے بعد مشرقِ وسطیٰ سے گرفتار کر لیا ہے۔

امریکی محکمہ انصاف کے مطابق 54 سالہ خالد ستاری پر امریکی صحت کے قومی پروگرام ‘میڈیکئیر’ (Medicare) کو 547 ملین ڈالر (تقریباً 54 ارب پاکستانی روپے) کا چونا لگانے کا الزام ہے۔ ملزم گزشتہ تین سال سے روپوش تھا جسے پیر کے روز مشرقِ وسطیٰ کے ایک ملک سے حراست میں لیا گیا۔

پراسیکیوٹرز کے مطابق خالد ستاری کے خلاف 2019 میں لوئیزیانا کی عدالت میں فردِ جرم عائد کی گئی تھی۔ ملزم نے 2016 سے 2019 کے دوران متعدد مہمات، جعلی مارکیٹنگ اور ڈاکٹروں و ایجنٹوں کو کروڑوں ڈالر کے غیر قانونی کمیشن (کِک بیکس) اور رشوت دے کر مریضوں کے غیر ضروری اور انتہائی مہنگے جینیٹک ٹیسٹ تیار کروائے۔ ان میں سے فی ٹیسٹ 20 ہزار ڈالر تک کی خطیر رقم میڈیکئیر سے حاصل کی گئی، جس سے امریکی خزانے کو اربوں کا نقصان پہنچا