ایم کیو ایم کا نئے صوبوں کیلئے ریفرنڈم کرانے کا عندیہ

ایم کیو ایم پاکستان کے سینئر رہنما فاروق ستار نے اعلان کیا ہے کہ اگر حکومت نے ملک میں نئے انتظامی یونٹس اور صوبوں کے قیام کے لیے ریفرنڈم نہ کرایا تو ایم کیو ایم خود ریفرنڈم کا انعقاد کرے گی۔ اپنے اہم بیان میں انہوں نے کہا کہ اب الٹی گنتی شروع ہو چکی ہے اور ملک کے نوجوانوں کی تحریک نئے صوبوں کی جدوجہد میں ابھر کر سامنے آئے گی۔ فاروق ستار نے اس بات پر افسوس کا اظہار کیا کہ کراچی پچھلے 80 سال سے پورے ملک کو سب سے زیادہ وسائل اور ٹیکس فراہم کر رہا ہے، لیکن بدقسمتی سے یہاں کے شہریوں کو بنیادی انصاف تک میسر نہیں۔

فاروق ستار نے تاجر میر رضا علی کے پراسرار قتل کی سخت الفاظ میں مذمت کرتے ہوئے متاثرہ خاندان سے کامل یکجہتی کا اظہار کیا اور عوام سے اپیل کی کہ وہ مقتول کو انصاف دلانے کے لیے سڑکوں پر نکلیں۔ انہوں نے کیس کی تفتیش کا رخ موڑنے کی کوششوں کو تنقید کا نشانہ بناتے ہوئے کہا کہ میر رضا کے ابتدائی پوسٹ مارٹم سے لیڈی سرجن بھی مطمئن نہیں تھیں۔ اس کے علاوہ فاروق ستار نے صومالیہ میں یرغمال بنائے گئے 10 پاکستانی شہریوں کی فوری و محفوظ رہائی کے لیے وزیراعظم اور فیلڈ مارشل سے ہنگامی اقدامات اٹھانے کی اپیل بھی کی