پی ایس ایل 11: فخر زمان پر بال ٹمپرنگ ثابت، 2 میچز کے لیے معطل

لاہور: پاکستان کرکٹ بورڈ (PCB) نے قومی کرکٹر اور لاہور قلندرز کے اہم کھلاڑی فخر زمان کو بال ٹیمپرنگ کا قصوروار پائے جانے پر دو میچوں کے لیے معطل کر دیا ہے۔ پی سی بی کے مطابق، یہ واقعہ لاہور قلندرز اور کراچی کنگز کے درمیان کھیلے گئے میچ کے دوران رپورٹ ہوا تھا، جس کے بعد ضابطہ اخلاق کی ‘لیول تھری’ کی خلاف ورزی کے تحت کارروائی کی گئی۔

میچ ریفری روشن مہاناما نے اس کیس کی تادیبی سماعت کی، جس میں تمام دستیاب شواہد کا باریک بینی سے جائزہ لیا گیا۔ سماعت کے دوران لاہور قلندرز کے کپتان شاہین شاہ آفریدی، ٹیم ڈائریکٹر سمین رانا اور ٹیم منیجر فاروق انور بھی موجود تھے۔ فخر زمان کو ذاتی صفائی کا موقع فراہم کرنے کے بعد ریفری نے انہیں قصوروار قرار دیتے ہوئے دو میچز کی پابندی کی سزا سنائی۔

اس معطلی کے باعث فخر زمان اب پی ایس ایل 11 کے دو اہم میچوں میں اپنی ٹیم کی نمائندگی نہیں کر سکیں گے۔ وہ ملتان سلطانز اور اسلام آباد یونائیٹڈ کے خلاف ہونے والے ہائی پروفائل مقابلوں سے باہر ہو گئے ہیں۔ لاہور قلندرز کی انتظامیہ نے اس فیصلے پر تشویش کا اظہار کیا ہے، تاہم پی سی بی کا کہنا ہے کہ کھیل کی ساکھ پر کوئی سمجھوتہ نہیں کیا جائے گا۔