دہشت گردوں کو پناہ نہ دیں، صوبہ دہشت گردی سے پاک کرینگے: فیصل کریم

گورنر خیبرپختونخوا فیصل کریم کنڈی نے واضح کیا ہے کہ صوبے کو ہر صورت دہشت گردی سے پاک کیا جائے گا اور شہداء کی قربانیوں کو ضائع نہیں ہونے دیا جائے گا۔ انہوں نے زور دیا کہ دہشت گردوں کے خلاف بلاامتیاز اور مؤثر کارروائی کے سوا اب کوئی دوسرا راستہ نہیں بچا۔

چار سدہ میں شہید ڈی ایس پی عمران الدین اور سپاہی کاظم جان کی رہائش گاہوں پر اہل خانہ سے تعزیت اور فاتحہ خوانی کے بعد میڈیا سے گفتگو کرتے ہوئے گورنر خیبرپختونخوا نے کہا کہ قومی ایپکس کمیٹی کے اجلاس میں وزیراعظم نے دہشت گردی کے خلاف زیرو ٹالرنس (Zero Tolerance) کی پالیسی پر عملدرآمد کا اعادہ کیا ہے۔ ان کا کہنا تھا کہ افغانستان سے غیر ملکی افواج کے انخلا کے بعد چھوڑا گیا جدید اسلحہ دہشت گردوں کے ہاتھ لگا، تاہم حکومت صوبائی پولیس کو جدید ترین اسلحہ اور تمام ضروری وسائل فراہم کرے گی، جس کے لیے وفاقی وزیر داخلہ محسن نقوی نے بھی کامل یقین دہانی کرائی ہے۔

فیصل کریم کنڈی نے عوام سے اپیل کی کہ وہ دہشت گردوں سے دور رہیں اور انہیں اپنے درمیان پناہ نہ دیں۔ آئینِ پاکستان کو تسلیم نہ کرنے والے عناصر سے مذاکرات نہ کرنے کا اعادہ کرتے ہوئے ان کا کہنا تھا کہ صوبے میں امن و امان کے قیام کے بعد معدنیات اور سیاحت کے شعبوں کو فروغ دیا جائے گا، جبکہ معدنی وسائل پر پہلا حق مقامی عوام کا ہے۔