فرانس اور یورپ میں جان لیوا ہیٹ ویو کی اصل وجہ ‘اومیگا بلاک’! آخر یہ کیا ہے؟

فرانس سمیت پورے یورپ کو اپنی لپیٹ میں لینے والی حالیہ جان لیوا اور شدید ترین ہیٹ ویو کی اصل سائنسی وجہ سامنے آ گئی ہے۔ موسمیاتی ماہرین نے انکشاف کیا ہے کہ اس خوفناک گرمی کی بنیادی وجہ ایک خاص اور ضدی موسمی نظام ہے، جسے سائنسی زبان میں ‘اومیگا بلاک’ (Omega Block) کہا جاتا ہے۔ ماہرین کے مطابق ‘اومیگا بلاک’ ہوا کے دباؤ کا ایک ایسا مخصوص پیٹرن ہے جس میں دو سرد اور کم دباؤ (Low Pressure) والے موسمی حصوں کے درمیان ہائی پریشر (ہوا کے زیادہ دباؤ) کا ایک شدید گرم حصہ پھنس جاتا ہے۔ عام حالات میں کرہ ارض پر چلنے والی ہوائیں موسم کو مغرب سے مشرق کی طرف دھکیلتی رہتی ہیں، لیکن ‘اومیگا بلاک’ کے بننے سے ہوا کا یہ قدرتی بہاؤ مکمل طور پر رک جاتا ہے اور گرم ہوا ایک ہی جگہ پر محصور ہو کر رہ جاتی ہے۔ رپورٹ کے مطابق یہ بلاک عام حالات میں 3 سے 10 دن تک رہتا ہے، لیکن موجودہ تشویشناک صورتحال میں یہ کئی ہفتوں سے برقرار ہے۔ اس شدید ہائی پریشر کی وجہ سے فضا میں بادل نہیں بن پا رہے، جس کے باعث فرانس، اسپین اور برطانیہ میں سورج کی براہِ راست تپش نے گرمی کے تمام سابقہ ریکارڈ توڑ دیے ہیں۔ ‘ورلڈ ویدر ایٹری بیوشن’ کے ماہرین نے اپنی حالیہ تحقیقی رپورٹ میں واشنگٹن اور یورپی دارالحکومتوں کو جھنجھوڑتے ہوئے انکشاف کیا ہے کہ موسمیاتی تبدیلیوں (Climate Change) کے بغیر یورپ میں اس نوعیت کی ریکارڈ توڑ گرمی کا ہونا بالکل ناممکن تھا۔ صنعتی دور کے آغاز سے اب تک کوئلہ، تیل اور گیس کے بے دریغ استعمال کے باعث زمین کا اوسط درجہ حرارت 1.4 ڈگری سیلسیس تک بڑھ چکا ہے۔ یہی وجہ ہے کہ اب دنیا بھر میں ہیٹ ویوز زیادہ طویل، شدید اور کثرت سے آ رہی ہیں۔ ماہرین نے خبردار کیا ہے کہ اگر زہریلی گیسوں کا اخراج فوری کم نہ کیا گیا تو دنیا مزید بڑی ماحولیاتی تباہی کا شکار ہو جائے گی۔ ماحولیاتی ماہرین کا کہنا ہے کہ مغربی اور یورپی ممالک ایک طویل عرصے سے ایشیا کے ترقی پذیر ملکوں کو صنعتوں سے مضرِ صحت گیسوں کے اخراج پر بار بار وارننگ جاری کر رہے تھے اور 10 سال پہلے ان پر پابندیاں لگانے کا اشارہ بھی دے چکے تھے۔