کالعدم عوامی ایکشن کمیٹی کا مالیاتی نیٹ ورک بے نقاب، متعدد افراد گرفتار

آزاد جموں و کشمیر میں امن و امان کی صورتحال کو سبوتاژ کرنے کی کوششوں کے خلاف پولیس نے بڑی کارروائی کرتے ہوئے کالعدم ایکشن کمیٹی کے مالیاتی نیٹ ورک کو بے نقاب کر دیا ہے اور راولاکوٹ دھرنے کے لیے فنڈز منتقل کرنے والے سہولت کاروں کو گرفتار کر لیا ہے۔ کالعدم کمیٹی کا یہ مالیاتی نیٹ ورک لوگوں کو مبینہ طور پر ہراساں کر کے اور ڈرا دھمکا کر فنڈز اکٹھے کرنے میں ملوث پایا گیا ہے۔ اس گروہ کے روابط بیرونِ ملک بھی تھے جہاں سے رقوم منگوائی جا رہی تھیں۔ یہ فنڈز راولاکوٹ دھرنے اور دیگر پرتشدد کارروائیوں کی مالی معاونت کے لیے استعمال کیے جا رہے تھے، تاہم پولیس نے بروقت کارروائی کرتے ہوئے اس نیٹ ورک کے اہم ارکان کو حراست میں لے لیا۔  پولیس کی گرفت میں آنے والے سہولت کار مہتاب احمد نے اعتراف کیا ہے کہ کالعدم کمیٹی کے سرغنہ حمزہ نے اسے فون پر مختلف افراد سے فنڈز اکٹھے کر کے راولاکوٹ بھجوانے کی ہدایات دی تھیں، تاہم رقم لے جاتے ہوئے آزاد کشمیر پولیس نے اسے دھر لیا۔ دوسرے گرفتار ملزم رضوان نے بھی تصدیق کی کہ اسے مختلف لوگوں سے رقم لے کر مہتاب کے حوالے کرنے کا ٹاسک دیا گیا تھا۔ دوسری جانب، نیٹ ورک کے سرغنہ حمزہ کے والد نے بھی راولاکوٹ کے لیے پیسے منگوانے اور کمیٹی کی مالی معاونت کا اعتراف کیا ہے۔ انہوں نے واضح کیا کہ یہ رقوم انتشاری سرگرمیوں کے لیے استعمال کی جا رہی تھیں، جس کے باعث انہوں نے اب اس کالعدم تنظیم سے مکمل طور پر لاتعلقی کا اعلان کر دیا ہے۔